Reided 2 | ||
EL <PIROPO>Kisi danemobs-li eli <piropo>? El <piropo> binon stimod nenplafik me kel hi-Spanyänan stimodom su süt vomi jönik. Stimod, kel reto mödadilo pasagon ko desin, das plä leplekäb, votans i lilons oni. Binos vemo plitülik ad flätön lupleidi vomik me vokäd stunidöl, jäst teatik, ab vöd ela <galan> binon pas lölöfiko voätik, if i beigolans i kanons juitön oni. El <piropo> u <requiebro> binon malik pro kalad Spanyänana. Vom Spanyänik kösömof so vemo, das palüspikof smugiko lo publüg, das of, ven fät dugon ofi lü läns nolüdikum, stunof dö nenotodäl nofik, keli mans foginänik jonüloms ofe. Smil nonik, lefänam nonik me hät, el <piropo> nonik, kanon padunön fa nolüdänans koldälik et! Nö! tän in Spanyän ... Binos lönanatäl hi-Spanyänana ad plimön: sevom sunädo, kisi mutoy lüvokädön vome beispatöl. El <piropo> voik no pedobüköl nelabon selediko cogedi; i dinäds bolitik e topiks no selediko pagebädons ad gevön ele <piropo> nidi mödikum. <Pro vom somik fägoböv ad vedön monäkiälan,> hi-Spanyänan lelöfädik vokädom pö logam jipula yunik löfik. Pö naed votik küpäl pastiron medamiko lü jibeigolan keinik: <Deükolöd häti olik pro lädül lejönik et!> hiyunan samo spikom nelaodiko (?) ini lil kompenana okik. No selediko i mot jiväläba pagebädof as zeil ela <piropo> voätik: <Kio läbik mot mutof binön, kel emotof jijönani somik ...!> Tälen ad sagön nentöbido eli <requiebro> bluvükon suvo fogänani, ab ga i patudigidon semikna. Ibä klülädos, das sagods spiritik mödik no binons votiks, äsä prafads prosadik pöpalidas vönädik. Suvo els <coplas> at blünons nensevedo yegädi pro vokäds stunüköl, kels binons kösömafraseods. I bib binon fonät danöfik pro el <piropo>, pato lekanit ela <Salomon>. Hebrey koedon senälön dönuamo fluni oka; igo nüdugot ad <piropos> mödik: <ole>! pedütülon de el <joleh> hebreyik. El <galan> binom semikna letälenik pö datik käfedas ad tirädön küpäli. <Viloböv, das odeadobös aneito>! tonos süpo, e vom mutof vo labön ladöfi düfälik ad no logön seimna dü timül lü lifatufavan. Atos binon mögod mana! Loged bal se logs ofik, e sludom laodo: <Nu no labob plu desiri ad deadön! Logs äsä stels ... >! Klüliko jön logotik binon yegäd danöfik pro lobams. So jönik äsä jivirgan <Maria>, logs äs stels, smilil flenöfik - ats valik binons keinots, kels pakazetons vemo. Pato logs e futils voma Spanyänik ai dönu pabekanitons; pük nevoik mu petuüköl pöton pö atos! Logs no kanons vo nidön saidiko, futils no kanons binön saidiko smaliks e gütöfiks. Fe ... voms mödikün, kels mutofs dalilön elis <piropos> labofs magedi smalik. Ibä hi-Spanyänan, kel natälo no binom gretik, löfilom te ... kekompenani nog smalikumi! | ||