Reided 7

SKRÄDAN

Bü dels anik äluxamob kuratiko klotikipedöpi obik.

Äklülos lü ob, das no kanoböv vitön ad remön mödoti ze gretiki klotas nulik pro nifüp.

Klots ömik ivedons so nenulädiks, das no plu kanoböv binön saidiko klotugik me ons.

Pimütob go balugiko ad golön lü skrädan obik.

Keli neodob bü val, ut binon lugunaklotem komunik pro geb aldelik. Jakäti gebob so seledo, ab i klotemi somik no kanob nelabön.

Mutob büedön mekön pro ob guni e jiläti binü stof natöfik, e lä ats bliti stripik.

Klotis pro pöts zälik, zäls e zälüls labob läbiko, sevabo: trelülaguni. Trelülajilät vietik binon klot balik, keli nelabob.

Skrädan igetom ebo stoki nulik stofas pro säsun. Binon patiko liegöfik.

Äjonom obe lemödoti stofas difik in köls valasotik: jeviot, köbamayän ed el "tweed" Linglänik.

Bi el "braun" binon attimo vogädaköl, ävälob fino klotemi köbamayänik braunik, gudik. Lajiman ämafotom obi in mafidacem ed äpenotom vipis valik oba.

Spelob, das klotem at oplöpon gudikumo ka ut, keli äbonedob ün äyel. Et no iplöpon pö lajimam; gun no äbinon gudik topü jots.

Reto kanob komandön levemo skrädani obik. Binom lejiman plobik e voban skilik in voböp. Om it töbidom plödakösömiko ad kotenükön laidaremanis okik e ad fölön vipis onas.

Nifüpaplögun gudon büfo, ab mutob labön häti nulik. I pemütob ad remön reinaguni nulik; ab somiki remob nejeriküno as konfäkot in konfäkotiselidöp. Täno vitob i töbi valik pö mafid.