[Volapük.com]  Volapük.com Home
 
  

KLÄNS NEITA

 

fa hiel Rud. Schmidt

In Suomiyän vöno feilan yunik älifom. Do äbinos vob sevärik ad befeilön länedi neflukik, ai äbinom ye fredik. In län at, kiöp pöp binon smalik, mens lifons soaliko ko oks it e ko nat. Ven feilan yunik ämufükom hobubis oka foi ed ätöbom ad mekön grufis dibik, äbinom yofik ven laud äkaniton love kap oma; täno äjinos, das äkaniton in om it.

Vilag in kel älifom päzüon me fots legretik e nepekulivöls, kels binons in dil gretikün läna, e dö kels esagoy, das tevoy in ats äs su lestab mela. Du hitüp brefik is lut labon klüli nekösömik, ed äkanoy kliliko logön lakis gretik, kels äseatons in fag. Ven nu soar äkomon, e te veal ätegon lunidi dela, nendas ädepubon löliko, täno äsenoy fredi anik, keli vob sevärik no ikanon moükön. Pianiko ven soar ämogolon, fred at päcenon ed ävedon levip seledik lü nepesevikos.

Ätevom ini fots, kiöp äjinos, das jadamags äbinons bevü stams, e ven änilikoy lü ons, ädepubons. In lulit seledik, äjinos, das äbinos zesüdik, das neit äninädon klänis, ed ävipom vemo sevön atis.

Semanaedo ini län äkömom Mana-leplekan semik; so magivans panemoms in pük Suomiyänik. Ko magivan at vöno äspikom, ed äsagom ome vipi oka.

"Ba okanob fölön vipi ola ", magivan äsagom. "Ab meditolös veräto; ibo no oblinos ole fredi ".

Feilan yunik ye ävipom, das vip pöfölonöv.

"Benö! "magivan äsagom, "ekö bodil, lespälolös ati kudiko. Ün neit bü zehitüp reg snekas e trups gretik oma okolkömoms nilü sim fota ed odrinom se gef goldik miligi jikapara sülik. If okanol luimükön bodili in milig at e poso fidön ati, täno vip olik pofölon; ab dönu sagob ole, das olepidol atosi! "

Te dels nemödik äbinons bü zehitüp; alna feilan yunik älogom, das neit äprimon, levip oma äglofon; lesagis magivana no ämebom.

Fino neit penemöl äkömon, ed äspidom lü sim fota. Su bälät plenik älogom in fag lubeli, kiöp nek büo ibinon. Ästopom prüdiko. Süpo lit spagöl änidilon love lubel, e se flans valik älilom tonodis seledik. Zü om sneks äbinons, kels änilikons lü lubel. Nevilöfiko äsökom snekis e suno älogom, das lubel äbinon kum legretik snekas. Kum äglofon, ven änilikom, e nu älogom, das valiks äbinons zü snek gretik, kel älabon kopi so bigik äs nadabim gretikün ed äflekons okis zi on, e mils logas nidik älogedons oni ün tim it. Snekakop legretik ätenükon oki, e in lut feilan älogom kapi oma, kel äpolon kroni goldik, de kel lit äsegolon. Süpo älogom, das snek äjonon linegi lunik e lediki, e demü atos pajekom vemo. Täno älogom bü ok gefi goldik me milig pefulüköl. Spidiko äluimükom bodili ko milig ed äfidom oti.

Nu äjinos, das tonods ut, kelis büo älilom, pänämükons tumna. Äfugom äs spidiko äs mögiko, ed äjinos, das ärönom spidikumo ka ai. Lätiko ädofalom.

Ven ägalom, äbinos del klülik. Nu älogom, das äbinom fagik de top, kiöp älogom snekis, ed äbinom reto saunik. Äbinos milig jikapara, kel inämükon omi; nu äspetom, das et ämaifükon logis oma.

Sosus sol äprimon ad modonikön, ägolom nesufädiko ini fot, e ven lulit neita ikömon, äbinom in top, kel löliko päzüon me bims ko stams vietik, kels älunidons in munasviet. Zänodü glun äbinon kevöfik ed äbinon us lulak. Aneito no äbinos äs ai. Sirk lenomik pipladoy de mabastons nidik, ünü kel älogoy vatapleni leklülik e lestilik. Lölikos äfomos äs banagef legretik. Äklänedom oki po bimül seimik ad logön, kelosi öjenosöv.

Zeneito älogom bevü stams fomis klilik e fogik, kels äflumons se flans valik. Äbinofs vomüls lejönik e lelöfiks. Pävealofs in veals klilik, kela köl vietik äcenon ini lunid blövik e grünik, kels änidons ko klül gretik. Ven ärivofs topädi maba, äjedofs su sim klotis leitik okas, ed älogom, das koaps vietik ädepubons ini vat, ed äpubons lesuno dönu. So ädunofs dü tim anik; ab fino äjinos, das banam päfinon. Kum lölik nu äkolkömon in topäd ed ädanüdon ko mufs flekik e nenomik, ab ye lejönik, zü mabatopäd. Herem lunik älagon flitöl love ofs, ye leno ävienos, e no äliloy tonodi seimik. Love bimatips vesüdio nog äbinons liens glutik; ab lunid redik in lut ya änunon, kiöp sol in lofüd äsülöpikon dönu. Bevü tuigs ün tim it mun äsvieton. Lad yunana äflapon, e kapaflan omik änokon; ävipom, das ölabomöv logis tum ad kanön ün tim it logön fomis lejönik valik. Äbinons sens koldik e selediks, kels no älevipons juiti midälik, ab te ävipons lelogön.

Fino dag klänafulik äprimon ad depubön, e fog ävedon densitikum e vietikum; nog äkanom logön nekleiliko in fog at fomis lejönis; ab ven solastral balid äpubon, fog ävedon stem nedudranovik. Yunan äsustanom se stäat oka ed ägolom da yeb. No igolom lunüpo büä äfulükon jukis oma lulakavat. No äkanom plu logön mabatopädi.

Ägolom domio ed äjedom oki feniko sui bed okik. Te äbinos slipil, keli äjuitom; ab ye äsenom fredi seledik, bi äsevom bosi, kelosi mens votik no äsevons. Ven ägalikom, fred ävedon klilikum ed äfulükon omi lefuliko, ab nu älevipom nesufädiko, das neit ökömonöv.

Sosus neit änilikon, ägolom lü fotasim ed älogom fomis otik äs äneito. Leigo äjenos ün neit kilid, e fred omik äglofon.

Ün neit folid äkömom dönu lü fotasim, love kel mun äsvieton, e fog ätovon oki in lut. Äbinos top lejönik, ab no älogedom atosi. Äspetom, das vomüls lelöfik öpubofsöv, ab—ün neit at no älogom ofis. Glumiko ägolom domio dönu; ab ün neits sököl i no älogom vomülis, ed ädäsperom. Nu ädugolom i topis votik in fot ad tuvön dönu vomülis lejönik, kels ai äbinofs in meb omik; ab neläbiko äbinos vaniko. Ätuvom nosi, kel fädo öprodos büsenis e tikis. Älogedom pledi jadas bevü stams e bimüls ko lindif lefulik. Tonodis mödik ut, kels ai binons in fot e kels kösömo jekons meni, äkanom distükön se ods, e no äjekons omi.

Suno in vilag zehitüpazäl yelik öjenon, e pöp disipik ökolkömon pötü zäl at. I feilan yunik ökomom äs ün yels büik. Neai ävitom menis, e ko jiyunans vilaga ispikom leviliko, do ilöfom neki ofas. Ab tü tim at no äjenos äs büo. Äbinos äsif ikömom se län votik e no äbinom in vilag it, in kel pimotom ed ilifom. Füm nenatik otik, keli siens omik igetons tefü dins in nat, id äsökon omi du äbinom bevü mens. Äbinons mals so mödik nejöna, mebs so mödik dö dols e töbs lifa, kels nu balidna ädranons in lan omik, e dub atos fred kolköma ävedon nekoven e dol. Äsenom migi zuna äsi glöta, bi no älogedom dinis ko klil delik at. Ävedos ome nemögik ad blibön lunikumo in vilag, e dönu ägolom ini soal fota; ab fot äbinon gagik e nelifik äs büo—äsagon ome nosi.

Semikna äkömon ome tik ut, das nu, ven ko logs ilogom utosi, kelosi te büo ibüosenom, vob omik ösötom vedön ome nefikulikum e lasumikum. Nu änolom kliliko atosi, kel büo nekliliko iflunos omi. Äbinos zesüdik, das ögivosöv gespiki se siäm omik, ven ävobom vemo! Alna ven äblufom atosi, vob äbinon ome dönu tom, e kein dela nu äbinon ome kof. Lan lölik oma päpedon fa mebs glumik.

Vöno gödo in fot äkolkömom magivani. At ätävom ed älabom stafi in nam: ätävom lü top votik. Yunan äkonfidom ome glifi oka.

"Vip ola pefölon, " magivan äsagom, "lesag obik efümükon oki. Nu sevol kläni neita Suomiyänik. Elogol kolkömi dautas se el <Mets-hallia> e se el <Muru-eide>, vatajigod e talajigod. Nulükofs okis in fot dub banam e dub danüd fedi oksik, e de atos sekidon fluköf in län ".

"Okömofs—li dönu? Kiüp ologob ofis dönu? "äsäkom yunan ko cügs flamöl.

"Kolkömofs in hitüpaneits kil a yeltum, "magivan äsagom. "Äsagob ole, das äbinos seledikos, keli ai ölogol. Ab dönuami töbo ologol. "

Yunan älogedom omi stunüköl ed äsagom: "Äbinos badikos, bi no äsagol obe atosi! "

"Meditolös, va kredol, das vöds oba ilabons seki! "magivan ägespikom, ed ämogolom.

FIN